Бишкек, 03.11.26. /Кабар/. Суу ресурстары, айыл чарба жана кайра иштетүү өнөр жайы министрлигинин кызматкерлери Түштүк Кореяда айыл чарбасын санариптештирүү жана заманбап технологияларды колдонуу боюнча окуудан өтүштү.
Министрликтин маалыматына ылайык, окуу 18-31-октябрь күндөрү Корея Эл аралык кызматташтык агенттигинин (KOICA) чакыруусу менен уюштурулду.
Эки жумалык программанын алкагында адистер "акылдуу ферма" технологиялары, күнөсканалардагы климатты автоматтык башкаруу, айыл чарба продукциясын сорттоо, сапатын көзөмөлдөө жана логистиканы өнүктүрүү боюнча тажрыйба алышты.
Ошондой эле делегация Кореядагы заманбап күнөскана комплекстерин, кайра иштетүү ишканаларын жана логистикалык борборлорду кыдырды. Окуунун жыйынтыгында катышуучулар алган билимдерин Кыргызстанда колдонуу боюнча иш-пландарды даярдашты.
