Бишкек, 26.12.25 /Кабар/. Түркияда укук коргоо органдары кеңири масштабдагы операциянын алкагында “Ислам мамлекети” террордук уюмуна тиешеси бар деп шектелген 115 адамды кармашты. Бул тууралуу Казинформ агенттиги жазды.
Маалыматка ылайык, шектүүлөр Жаңы жыл майрамдарында, негизинен мусулман эместердин иш-чараларына багытталган теракттарды даярдап жатышкан. Операция өлкө боюнча 124 даректе өткөрүлүп, анын жүрүшүндө курал-жарактар жана ок-дарылар табылып, тартып алынды.
Башкы прокуратура билдиргендей, кармалгандардан тышкары, дагы бир нече адамга издөө жарыяланган. Тергөө иштери уланууда.
Түркия бийлиги коопсуздук кызматтары коркунучту алдын ала таап, ыкчам аракет кылганынын натыйжасында чоң трагедиянын алдын алууга мүмкүн болгонун белгилешти.
