Бишкек, 02.04.26. /Кабар/. Түрк мамлекеттер уюмуна мүчө мамлекеттердин жалпы ички дүң продукциясы (ИДП) 2,4 трлн АКШ долларынан ашат. Бул тууралуу министрлер кабинетинин төрагасы Адылбек Касымалиев Азербайжандын Баку шаарында өткөн Түрк мамлекеттер уюмуна мүчө мамлекеттердин өкмөт башчыларынын жана вице-президенттеринин экинчи жыйынында билдирди.
Адылбек Касымалиев белгилегендей, Түрк мамлекеттер уюму маданий өз ара кызматташтыктын алкагынан чыгып, Евразия мейкиндигинде жаңы күч борборуна айланып баратат.
“Мүчө өлкөлөрдүн жалпы ички дүң продукциясы 2,4 трлн АКШ долларынан ашат, ал эми калкынын саны 160 миллионду түзөт. 2025-жылдын жыйынтыгы боюнча түрк аймагы экономикалык өсүштүн орточо 6 пайыздык деңгээлин көрсөттү, бул дүйнөлүк орточо көрсөткүчтөн эки эсе жогору”, - деди минкаб башчысы.
