Бишкек, 02.11.26. /Кабар/. Кыргызстан Түрк мамлекеттер уюмунун (ТМУ) үй-бүлө жана аялдар маселелери боюнча кеңешин түзүү демилгесин колдойт. Бул тууралуу эмгек, социалдык камсыздоо жана миграция министри Алмаз Имангазиев Анкарада өткөн жолугушууда билдирди.
Жолугушуу ТМУнун XIII саммитинин алкагында уюштурулуп, анда үй-бүлө институтун чыңдоо, балдарды коргоо, аялдардын мүмкүнчүлүктөрүн кеңейтүү жана социалдык чөйрөдөгү кызматташтыкты өнүктүрүү маселелери талкууланды.
Алмаз Имангазиев үй-бүлөнү, энеликти жана аталыкты колдоо, аялдардын лидерлигин өнүктүрүү мамлекеттик саясаттын артыкчылыктуу багыттары экенин белгиледи. Анын маалыматына караганда, Жогорку Кеңештеги аял депутаттардын үлүшү мурдагы чакырылыштагы 22 пайыздан 33 пайызга жеткен.
Ошондой эле министр жаш үй-бүлөлөрдү колдоо, аялдарга жана балдарга карата зомбулуктун, анын ичинде киберзомбулуктун алдын алуу жана балдардын санариптик коопсуздугун камсыз кылуу маселелерине токтолду.
