Бишкек, 31.10.26. /Кабар/. Ереван шаарында Бириккен Улуттар Уюмунун Биологиялык ар түрдүүлүк жөнүндө конвенциясынын (БАК) тараптарынын 17-конференциясынын (COP17) алкагында тоолор жана алар менен байланышкан тузсуз суу экосистемалары боюнча Ереван платформасынын расмий ачылышы болуп өттү. Жаңы эл аралык демилге тоолуу өлкөлөрдүн уникалдуу экосистемаларды коргоо, каржылоону тартуу жана эл аралык кызматташтыкты өнүктүрүү боюнча аракеттерин бириктирүүгө багытталган. Буга чейин лидерлер саммитинде президент Садыр Жапаров платформаны түзүүнү колдоп, анын ишине активдүү катышууга даяр экендигин билдирип, Ысык-Көлдүн экосистемасын сактоонун маанилүүлүгүн белгилеген.
COP17нин алкагында президенттин Тоо күн тартиби боюнча атайын өкүлү Динара Кемелова жетектеген делегация бир катар жогорку деңгээлдеги иш-чараларга катышты. Алардын катарында Биологиялык ар түрдүүлүккө мониторинг жүргүзүү боюнча Ереван технологиялык борборунун ачылышы, Тоо жана тузсуз суу биоартүрдүүлүгү боюнча глобалдык диалог, Жаратылышты коргоонун эл аралык союзунун "Жаратылышты калыбына келтирүү: милдеттенмелерден конкреттүү аракеттерге чейин" аттуу талкуусу, БУУӨПтүн тоо күн тартибин илгерилетүүгө арналган иш-чарасы, ошондой эле Кыргызстан, Армения жана Франциянын биргелешкен "Бийик чокулар - жогорку жоопкерчилик: тоо экосистемаларын коргоо" аттуу иш-чарасы болду.
COP17нин Жогорку деңгээлдеги сегментинде Динара Кемелова эл аралык коомчулукту тоо экосистемаларын коргоого көбүрөөк көңүл бурууга жана тоолуу өлкөлөрдүн каржылоо булактарына жеткиликтүүлүгүн кеңейтүүгө чакырды.
Өзгөчө көңүл Кыргызстандын демилгелерине бурулду: Глобалдык экологиялык фонддун алкагында атайын тоо программасын түзүү, Бишкек шаарында Тоолуу аймактардын туруктуулугу боюнча Глобалдык борборун ачуу жана Ысык-Көлдү сактоо максатында БУУнун колдоосу астында атайын трасттык фонд түзүү демилгелери белгиленди.
Иш-чаралардын жана Глобалдык экологиялык фонддун (ГЭФ), БУУнун Айлана-чөйрө боюнча программасынын (ЮНЕП) жетекчилери, башка эл аралык уюмдардын өкүлдөрү жана бир катар чет мамлекеттердин (Япония, Чехия, Колумбия, Бангладеш, Бразилия, Германия, Кения, Лесото ж.б.) өкүлдөрү менен өткөрүлгөн эки тараптуу жолугушуулардын жүрүшүндө кыргыз делегациясы өлкөнүн тоо экосистемаларын сактоо жана климаттык процесстер жаатындагы артыкчылыктуу багыттарын тааныштырды. Ошондой эле өнөктөштөргө "Бишкек+25" экинчи глобалдык тоо саммитине даярдыктар тууралуу маалымат берди.
COP17нин маанилүү жыйынтыктарынын бири катары COP18 өткөрүлгөнгө чейин Тоо биоартүрдүүлүгү боюнча иш программасын жаңылоо жөнүндө чечим кабыл алынды.
Кыргызстандын делегациясынын COP17деги ишинин дагы бир маанилүү жетишкендиги - Жаратылыш ресурстары, экология жана техникалык көзөмөл министрлигинин башкармалыгынын башчысы Кумар Мамбеталиевдин Биоартүрдүүлүк жөнүндө конвенциянын Тараптарынын конференциясынын бюросунун курамына кайрадан шайланышы болду.
