Бишкек, 19.06.26. /Кабар/. Баткен облусунун делегациясы Тажикстандын Худжанд шаарында өтүп жаткан XII эл аралык "Согди-2026" соода-инвестициялык жарманкесине катышууда. Бул тууралуу өкүлчүлүктөн билдиришти.
Маалыматка ылайык, анын алкагында "Соода жана инвестициялык мүмкүнчүлүктөр, кызматташтыктын келечеги" аталышындагы эл аралык форум болуп өттү.
Форумга Баткен облусунун башчысынын орун басары Абдирашит Ташбалтаев, Баткен районунун акими Данияр Иманалиев жана бир катар ишкерлер катышты.
Белгилей кетсек, иш-чарага дүйнөнүн 20 мамлекетинен келген 500дөн ашык чет элдик инвесторлор, ишкерлер жана расмий делегациялар катышып, ар кыл компаниялардын ишмердүүлүгү, инвестициялык долбоорлору жана кызматташуу мүмкүнчүлүктөрү менен таанышышты.
Форум соода-экономикалык байланыштарды кеңейтүү, инвестиция тартуу жана эки тараптуу кызматташтыкты өнүктүрүү максатын көздөйт.
