Бишкек, 21.11.25. /Кабар/. Сүлүктү шаарында жаштарды маданий жактан өнүктүрүү, тийиштүү шарттарды түзүү жана колдоо максатында маданий борбор ачылды.
Президенттин Баткен облусундагы өкүлчүлүгүнөн билдиришкендей, маданий борборго Билим берүүнүн мыктысы, маданиятка эмгек сиңирген кызматкер Увадат Сабурованын ысымы ыйгарылды.
Курулушка 2023-жылы Баткен облусун өнүктүрүүгө багытталып, республикалык
бюджеттен бөлүнгөн 500 млн сомдун эсебинен 50 млн сом, ал эми жергиликтүү бюджеттен 12 млн сом бөлүнгөн.
Учурда жаңы имаратка шаардык тарых музей, борборлоштурулган китепкана, балдар китепканасы жана шаардык балдар искусство мектептери
жайгаштырылды.
Маданият министрлиги тарабынан оргтехника, элдик аспаптар, эмеректер алып берилди. Ал эми жергиликтүү бюджеттен улуттук кийимдер алынды.
Ачылыш аземине президенттин өкүлү Айбек Шаменов, маданият, маалымат жана жаштар саясаты министринин орун басары Марат Тагаев жана Сүлүктү шаарынын мэри баш болгон жергиликтүү жетекчилер катышты.
