Бишкек, 20.02.25. /Кабар/. Ош шаарынын мэри Жеңишбек Токторбаев “Хунань Цзюнсинь Хуаньбао Кей Джи Инвест” кытай компаниясынын башкы директорунун орун басары Чжан Цзиньфанды кабыл алды.
Муниципалитеттен билдиришкендей, жолугушууда эки тараптуу кызматташтыкты өнүктүрүү, анын ичинде таштандыларды күйгүзүү аркылуу электр энергиясын өндүрүү үчүн заманбап ишкананы куруу боюнча инвестициялык долбоор талкууланды.
Аталган долбоор ишке ашырылса, кышкы мезгилде Ош шаарынын тургундарын ысык суу жана жылуулук менен камсыз кылуу мүмкүнчүлүктөрү кеңейтилип, шаардын экологиялык абалын жакшыртууга шарт түзүлөрү белгиленди.
Айта кетсек, долбоордун алкагында курула турган ишкана болжолдуу күнүнө кубаттуулугу 2 миң тонна таштанды иштетип, 50 мегаваттка чейин энергия чыгара алат.
Жолугушуунун соңунда долбоорду даярдоо жана инвестициялык кызматташтык келишимди, жумушчу топту түзүү боюнча макулдашылды.
