Бишкек, 26.01.26. /Кабар/. Ош облусунда күйүүчү-майлоочу материалдарды мыйзамсыз сатууну жана жүгүртүүнү аныктоо боюнча рейддик иш-чаралар өттү.
Салык кызматынан билдиришкендей, рейддин жүрүшүндө тиешелүү уруксат берүүчү документтери жок, 5 даана автоцистернаны колдонуу менен белгиленбеген жерлерде көчмө чекене соода жүргүзгөн күйүүчү-майлоочу материалдарды мыйзамсыз сатуу түйүндөрү аныкталды.
Аталган мыйзам бузуу фактылары боюнча автоцистерналардын ээлерине административдик айып салынып, транспорт каражаттары айып жайга токтотулду, күйүүчү-майлоочу материалдар алынды. Материалдар сот органдарына өткөрүп берилди.
Эске салсак, Кыргыз Республикасынын мыйзамдарына ылайык, мунайзаттарды чекене сатууга контролдук-кассалык машиналар, атайын күйүүчү май жабдуулары (отун таратуучу колонкалар) жана автоматташтырылган эсепке алуу системалары милдеттүү түрдө болгон автомай куюучу станцияларда, автомобилдик газ толтуруучу, компрессордук станцияларда гана уруксат берилет.
