Бишкек 21.07.25 /Кабар/. Ош шаарынын борбордук аянтын оңдоп-түзөө иштерине бөлүнгөн ири өлчөмдөгү акча каражаттын максатсыз пайдаланууга байланышкан коррупциялык схеманын бети ачылды.
Ички иштер министрлигинен билдиришкендей, милиция кызматкерлери тарабынан жүргүзүлгөн тергөө иш-чараларынын жүрүшүндө Ош шаарынын мэриясынын жана анын капиталдык курулуш башкармалыгынын, КР Коомчулукту өнүктүрүү жана инвестициялоо боюнча агенттигинин (АРИС), эки курулуш компаниянын кызмат адамдары, кызмат абалдарынан кыянаттык менен пайдаланышып, атайылап, иштердин көлөмүн көп көрсөтүп жазышып, алынчу курулуш материалдарынын бааларын жогорулатылган баалар менен тендер өткөрүшкөн. Натыйжада мамлекетке 25 млн 690 миң 143 сом материалдык зыян келтирилген.
Аталган факты боюнча Кылмыш-жаза кодексинин "Коррупция" беренесименен кылмыш иши козголгон.
Тергөөнүн жүрүшүндө Ош шаарынын мурдагы вице-мэри 1981-жылы туулган И.М., инженер кеңешчи 1967-жылы туулган Э.Э., мамлекеттик архитектуралык-курулуштук контроль жүргүзүүчү мамлекеттик инспектор 1992-жылы туулган Т.Т., Ош шаары боюнча мамлекеттик архитектура-курулуш контролдоо башкармалыгынын башчысынын орун басары 1988-жылы туулган А.А. жана жаран 1981-жылы туулган Н.С. кармалды.
Кармалгандар соттун чечими менен камакка алынды.
Учурда тергөө амалдары жүргүзүлүүдө.
