Бишкек, 11.02.25. /Кабар/. Күн мурун Ош шаарынын мэри Жеңишбек Токторбаев Төлөйкөн айылдык аймактык башкармалыгынын жашоочулары менен жолугушту.
Муниципалитеттен билдиришкендей, анда мэр элден келип түшкөн кайрылуулардын негизинде аткарылган жумуштар боюнча маалымат берди.
Андан кийин жашоочулар аймактагы айрым көйгөйлүү маселелер боюнча өздөрүнүн суроолорун беришти.
Алсак, айрым көчөлөрдө жолдорду асфальттоо, тротуарларды, мектеп, бала бакчаларды куруу, жер мунапысы, трансформацияланган жана сугат жерлерди карап чыгуу, кош каржылоо программасынын алкагында канализацияга, газга коштуруу, экология маселелерин көтөрүштү.
Мэр Жеңишбек Токторбаев жарандардын кайрылууларына жооп берүү менен бирге айтылган маселелер боюнча жерине барып, жакындан өзү таанышып чыгарын билдирди.
Ошондой эле жыйында көтөрүлгөн маселелерди чечүү боюнча тиешелүү кызматтардын жетекчилерине бир катар тапшырмаларды берди.
