Бишкек, 09.02.26. /Кабар/. Ошто курулуш компаниялары унаа токтотуучу жайлар боюнча жалган маалымат берип, мыйзамсыз коммерциялык имараттарды куруп алышканы аныкталды. Бул тууралуу УКМКдан билдиришти.
Атайын кызматтын маалыматына караганда, Ош архитектурасы курулуш долбоорлорун мыйзамсыз бекитип, компаниялар менен алдын ала келишим түзгөн. Натыйжада, шаардагы жол тармагы начарлап, тыгындар пайда болуп, инфраструктурага кошумча жүк келтирилген.
Мындан улам кылмыш иши козголуп, Ош шаарынын башкы архитекторунун биринчи орун басары Т.Ы.К. жана архитектура боюнча адиси Т.З.М. кармалып, убактылуу кармоочу жайга киргизилди.
Учурда иликтөө уланууда жана шаар курулушу чөйрөсүндөгү коррупциялык кылмыштарды аныктоо боюнча иш-чаралар жүргүзүлүүдө.
