Бишкек, 18.02.25. /Кабар/. Ош шаарында эл аралык баңгизат тобунун ишмердүүлүгүнө бөгөт коюлду. Бул тууралуу Улуттук коопсуздук мамлекеттик комитетинен билдиришти.
УКМК тарабынан баңгизаттардын мыйзамсыз жүгүртүлүшүнө каршы күрөшүү боюнча жүргүзүлүп жаткан иш-чаралардын жүрүшүндө Тажикстан-Кыргызстан-Өзбекстан багыты боюнча эл аралык наркоканалды уюштурган Ош облусунун айрым жашоочуларынан турган эл аралык уюшкан кылмыштуу топтун ишмердиги аныкталды.
Үстүбүздөгү жылдын 5-февралында жүргүзүлгөн атайын операциянын натыйжасында Ж.Х.Х .жана К.И.А. аттуу жарандар кармалган. Ж.Х.Х.нын үйүн тинтүү учурунда. 9 кг 793 гр салмактагы 10 брикет "афган чарсы" баңгизаты жана 1 кг белгисиз синтетикалык заттын 1 брикети табылган. Учурда аталган белгисиз заттын баңги зат экенин аныктоо үчүн тиешелүү экспертизалар жүргүзүлүүдө. Мындан тышкары, К.И.А.нын үйүндө салмагы 133,99 граммды түзгөн "афган чарсы" баңгизатынын 1 брикети табылган.
Жүргүзүлгөн тергөө иш-аракеттеринин натыйжасында уюшкан кылмыштуу баңги тобунун мүчөлөрүнө карата Ош шаардык соту тарабынан КР Кылмыш-жаза кодексинин 282-беренеси боюнча айып тагылып, УКМКнын тергөө абагына камакка алуу түрүндөгү баш коргоо чарасы тандалган.
УКМК баңгизаттарды мыйзамсыз жүгүртүүгө каршы күрөшүү боюнча иштерди улантууда.
