Бишкек, 19.03.26 /Кабар/. Адистер дүйнөнүн ар кайсы аймактарында аба ырайы кескин өзгөрүшү мүмкүн экенин эскертишүүдө. Себеби, Эль-Ниньо климаттык кубулушу 2026-жылдын аягында кайрадан башталышы ыктымал. Бул тууралуу BILD басылмасына таянып, Казинформ билдирди.
Маалыматка ылайык, бул кубулуш Тынч океандын экваторго жакын бөлүгүндөгү суунун жылышы менен байланыштуу. Ал адатта 2-7 жылда бир кайталанып, бүткүл дүйнөнүн климатына таасир этет.
Метеоролог Доминик Юнг төмөнкүлөргө токтолгон:
"Эль-Ниньо катталган жылдары аба ырайы кескин өзгөрүп, кургакчылык, сел жана адаттан тыш ысык байкалат. Ал эми 10-15 жылда бир кайталанган супер-Эль-Ниньо учурунда Тынч океандын суусунун температурасы эки градустан ашык жогорулап, анын дүйнөгө тийгизген таасири күчөйт",-деген ал.
Климатолог доктор Карстен Брандт кошумчалагандай, бул кубулуштун туу чокусу 2026-жылдын ноябрь айларында күтүлүп, эң күчтүү таасири 2027-жылдын январында байкалышы мүмкүн.
Анын айтымында, Эль-Ниньо жылдары дүйнөдө аба ырайы олуттуу өзгөрүп, табигый кырсыктар көбөйүп, кыйроолорго жана экономикалык чыгымдарга алып келиши мүмкүн.
Кесепеттери төмөндөгүдөй болушу ыктымал:
- Түндүк Америка: АКШнын батышында рекорддук ысык, кургакчылык катталып, токой өрттөрүнүн коркунучу жогорулайт.
- Түштүк-Чыгыш Азия: Филиппин, Кытай жана Японияда тайфундар болушу мүмкүн.
- Австралия, Индонезия, Чыгыш Африка, Кариб деңизи аймагы: катуу ысык жана кургакчылык күтүлөт.
- Перу жана Эквадор: нөшөрлөгөн жаан-чачын жана сел жүрүшү мүмкүн.
- Түштүк Американын, Африканын жана Жакынкы Чыгыштын тропикалык аймактары: нымдуулук жогорулап, өтө ысык болот.
Адистер белгилешкендей, Эль-Ниньо атмосферадагы агымдарга таасир берип, шамалдардын багытын, жаан-чачынды жана температураны дүйнө жүзү боюнча өзгөртөт. Супер-Эль-Ниньо учурунда бул кесепеттер өзгөчө күчтүү болуп, жаңы климаттык рекорддор коюлушу мүмкүн.
