Бишкек, 07.10.26 /Кабар/. Президент Садыр Жапаров бүгүн, 7-октябрда Нарын облусуна болгон бир күндүк иш сапарынын алкагында Нарын шаарындагы жана Кочкор районундагы Мамлекеттик ипотекалык компания тарабынан курулган көп кабаттуу үйлөрдүн ачылыш аземине катышты.
Президент өз сөзүндө бүгүн кут даарыган Теңир-Тоо жергесинде жакшы саамалыкка күбө болуу үчүн келип олтурганын айтты.
"Нарын шаарында алгачкы жолу 216 батирлүү жана Кочкор районунда 217 батирлүү заманбап турак жай комплекси пайдаланууга берилет. Турак жай комплекстеринде балдар үчүн оюн аянтчасы, эс алуу зоналары, спорттук аянтчалар, кеңсе жайлар, унаа токтотмолору сыяктуу зарыл шарттар каралган.
Эң алды баарыңыздарды Нарын шаары менен Кочкор айылынын көркүнө көрк кошуп жаткан жаңы турак жай комплекстеринин ачылышы менен чын дилимден куттуктаймын!
Үй ээлери, ак өргөөңүздөр кут болсун", - деди өлкө башчысы.
