Бишкек, 19.02.26. /Кабар/. Ош шаарында өтө ири өлчөмдөгү баңгизат сатуу ишмердүүлүгүнө бөгөт коюлду. Бул тууралуу ИИМден билдиришти.
Аталган факты боюнча "Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо" беренеси менен кылмыш иши козголгон.
Белгиленгендей, кылмыштуу ишмердүүлүккө бөгөт коюу үчүн бир нече этап менен атайын операция жүргүзүлгөн.
Алгач милиция кызматкерлери 1995-жылы туулган С.О.Б. аттуу жарандын "Дэу Нексия" унаасын тинтип, 101 грамм гашиш жана 155 миң сом табышкан.
Андан кийин 1989-жылы туулган Д.С.С. аттуу шектүүнүн үйүн тинтүү учурунда кызматтык иттин жардамы менен 4 кг 600 грамм гашиш, эки даана РГД-5 гранатасы, колго жасалган ок атуучу курал, 51 ок жана 2 миң доллар, 87 миң сом табылган.
Мындан соң кылмыштуу топтун башчысы катары 1982-жылы туулган К.С.С. аныкталып, ал буга чейин баңгилик кылмыштары үчүн чет мамлекеттерде бир нече жолу соттолгондугу белгилүү болду. Анын үйүнөн да баңгизат табылды.
Учурда бул кылмыштуу топко тиешеси бар башка жарандарды аныктоого багытталган тергөө-ыкчам иш-чаралары улантылууда.
