Бишкек, 18.02.25. /Кабар/. Ленинград облусунда 5 кыргызстандык өрттөн жабыркады. Бул тууралуу Тышкы иштер министрлигинен билдиришти.
Маалыматка ылайык, 16-февралда Ленинград облусунун Усть-Луга айылындагы жеке менчик кафеден өрт чыгып, анын кесепетинен 5 Кыргызстандын жараны ар түрдүү даражадагы күйүк алышкан.
"17-февралда Кыргызстандын 2 жараны Ленинград облустук ооруканасына текшерүүгө жиберилген. Ал эми үчөө Гатчинск ооруканасында биринчи медициналык жардам көрсөтүлүп, амбулатордук дарылоого чыгарылган", - деп айтылат маалыматта.
Белгиленгендей, бул факты боюнча Россиянын тергөө органы кылмыш ишин козгоду.
Маселе Кыргызстандын Ленинграддагы Башкы консулдугунун көзөмөлүнө алынды.
