Ташкент, 27.10.25. /Кабар/. Кыргызстандык бал аарычылары Наманган шаарында 24–26-октябрь күндөрү өткөн IV Эл аралык бал фестивалына катышып, өз продукциялары менен коноктордун жана жергиликтүү тургундардын жогору баасына ээ болушту.
Соода-өнөр жай палатасынын өкүлү Мирзамамат Кебекбаев баштаган делегация фестивалдын иш-чараларына активдүү катышты. Жалал-Абад облусунун Токтогул районунан келген бал аарычылар экологиялык таза тоо балынын жана аарычылык продукцияларынын түрлөрүн көрсөтүштү.
Наманган облусунун хокимиятынын маалыматына ылайык, Кыргызстандын балына болгон кызыгуу жогору болуп, керектөөчүлөр арасында чоң суроо-талап жаралган. Фестивалдын алкагында илимий-практикалык конференциялар, спорттук мелдештер, кол өнөрчүлөрдүн көргөзмөлөрү жана концерттик программалар уюштурулду.
Быйылкы иш-чарага 150дөн ашуун жергиликтүү жана чет элдик аарычылар катышып, фестивалды 2,5 миңге жакын чет элдик жана 10 миңге чейин жергиликтүү туристтер көрүштү.
