Бишкек, 21.09.26. /Кабар/. "Кыргызсуу долбоор" ААК Казакстан жана Өзбекстандын компаниялары менен заманбап сугат системаларын өнүктүрүү боюнча кызматташуу жөнүндө меморандумдарга кол койду.
Суу ресурстары, айыл чарба жана кайра иштетүү өнөр жайы министрлигинен билдиришкендей, аталган ишкананын делегациясы 15-18-сентябрда Казакстан жана Өзбекстанда иш сапарда болду.
Алматыда "ADAMANT Inc." компаниясы менен тамчылатып жана жамгырлатып сугаруу системаларын киргизүү, ошондой эле аларды Кыргызстандын климаттык жана гидрологиялык шарттарына ылайыкташтыруу маселелери талкууланды.
Ташкентте делегация бир катар компаниялардын өндүрүштүк мүмкүнчүлүктөрү жана заманбап сугат системалары үчүн жабдууларды өндүрүү технологиялары менен таанышты.
Жетишилген макулдашуулар Кыргызстанда суу үнөмдөөчү технологияларды практикалык негизде киргизүүгө, тажрыйба алмашууга жана заманбап сугат чечимдерин өлкөнүн шарттарына ылайыкташтырууга жол ачат.
