Бишкек, 05.01.26. /Кабар/. Кыргызстандын электрондук коммерция ассоциациясынын президенти Айбек Күрөңкеев B5+1 форумунун алкагында санариптик экономиканын өнүгүшү жана аймактык e-commerce кызматташтыгы тууралуу айтып берди.
Анын айтымында, Борбор Азия өлкөлөрү санариптештирүү тармагында эң жогорку өсүү динамикасын көрсөтүүдө. Буга аймактагы мамлекеттердин ортосундагы тарыхый, маданий жана экономикалык жалпылыктар, ошондой эле өз ара жигердүү тажрыйба алмашуу өбөлгө түзүүдө.
Негизги көрсөткүчтөр жана өсүш:
- Бүгүнкү күндө Ассоциацияга ритейл, маркетплейс, онлайн-соода жана логистика тармагындагы алдыңкы 50гө жакын компания мүчө.
- Катышуучулардын жалпы товар жүгүртүүсү 2,5 миллиард доллардан ашат, бул өлкөнүн жалпы электрондук соода рыногунун дээрлик жарымын түзөт.
- Ички электрондук сооданын көлөмү жылына 600 миллион долларга жетет, ал эми трансчек аралык операцияларды кошкондо 1 миллиард долларга жакындап калды.
- Рыноктун орточо жылдык өсүшү 15% түзөт. Электрондук сооданын чекене товар жүгүртүүдөгү үлүшү 10-11 пайызга жетип, өсүшүн улантууда.
Айбек Күрөңкеев белгилегендей, мындай натыйжалар мамлекеттин, финансы секторунун жана бизнестин биргелешкен ишинин аркасында мүмкүн болду. Бул аракеттер бүгүнкү күндө Борбор Азиянын бардык өлкөлөрүндө байкалып жаткан "санариптик дивиденддерди" камсыз кылды.
Төлөм инфраструктурасын өнүктүрүүгө өзгөчө көңүл бурулду. Кыргызстанда эл аралык жана улуттук төлөм системалары ийгиликтүү иштеп, системалардын өз ара шайкештиги (интероперабелдик) жигердүү өнүгүүдө. Жакында эле Казакстан менен интеграциялануу аяктап, Өзбекстан менен акча которуулар кеңейүүдө, ошондой эле Тажикстан жана башка кошуна өлкөлөр менен кызматташууга кызыгуу артууда.
Учурдагы негизги чакырыктар катары логистика жана аймак ичиндеги сооданы башкаруу (администрлөө) маселелери калууда. Ошону менен бирге, бардык өлкөлөрдө товарлардын санариптик карталары жана улуттук маалымат базалары түзүлгөн, бул маркетплейстер арасындагы интеграцияны тез масштабдоого мүмкүндүк берет.
Ассоциация башчысынын божомолунда, жакынкы айларда казак товарлары өзбек маркетплейстеринде, ал эми өзбек товарлары казак аянтчаларында пайда болот. Бул аймактык сооданын өнүгүшүнө чоң түрткү бермекчи.
Белгилей кетсек, бүгүн B5+1 форумунун экинчи иш күнү уланууда.
