Ташкент, 10.03.26. /Кабар/. Кыргызстан менен Өзбекстан өнөр жай тармагындагы кызматташтыкты кеңейтүүдө. Бул тууралуу Өзбекстандын Кыргызстандагы элчиси Саидикрам Ниязходжаев радионун түз эфиринде билдирди.
Анын айтымында, эки өлкөнүн экономикасы көп жагынан бири-бирин толуктап тургандыктан, өнөр жай кооперациясын өнүктүрүү эки тарап үчүн тең пайдалуу. Ошондуктан тараптар биргелешкен өндүрүш долбоорлорун ишке ашырууга өзгөчө көңүл бурууда.
Элчи белгилегендей, ар бир өлкөдө өнөктөш мамлекетке керектүү болгон ресурстар жана мүмкүнчүлүктөр бар. Өзбекстандагы айрым өндүрүштөр менен продукциялар Кыргызстан үчүн пайдалуу болсо, Кыргызстандын ресурстары жана потенциалы өзбек экономикасына да кызыкчылык жаратат.
Мындай кызматташуунун мисалы катары ал Кыргызстандагы автоунаа чыгаруу боюнча биргелешкен долбоорду атады. Анын маалыматына ылайык, өткөн жылы өлкө аймагында үч миңге жакын автоунаа чыгарылган.
Ниязходжаевдин айтымында, чыгарылган унаалар учурда Кыргызстанда колдонулуп, ички рынокто пайдаланылууда.
Ошондой эле ал бул долбоор эл аралык деңгээлде да көңүл бурууга татыганын белгиледи. Анын сөзүнө караганда, өткөн жылы АКШнын Көз карандысыздык күнүнө арналган иш-чарада АКШнын элчиси Кыргызстанда чыгарылган Chevrolet үлгүсүндөгү автоунааларды белгилеп, алардын өлкөдө өндүрүлүп, жолдордо колдонулуп жатканына кубанычын билдирген.
