Бишкек, 02.11.26. /Кабар/. Кыргызстан менен Азербайжандын аскердик кызматташтыгын кеңейтүү, биргелешкен машыгууларды өткөрүү жана аскер кызматкерлеринин тажрыйба алмашуусу талкууланды.
Ведомствонун маалыматына ылайык, коргоо министринин биринчи орун басары Талайбек Шаршеев жетектеген делегациянын Азербайжанга болгон иш сапарынын алкагында делегация Азербайжандын коргоо министри Закир Гасанов менен жолукту.
Тараптар аскердик кызматташтыктын актуалдуу маселелерин, биргелешкен машыгууларды өткөрүү, тажрыйба алмашуу жана аскер кызматкерлеринин кесиптик даярдыгын жогорулатуу багыттарын талкуулашты.
Делегация Жамшид Нахчыванский атындагы аскердик билим берүү мектебинин жана Азербайжандын Улуттук коргонуу университетинин ишмердүүлүгү, окуу базасы жана аскер кадрларын даярдоо системасы менен таанышты.
Сапардын алкагында Гейдар Алиев атындагы Аскер институтунда билим алып жаткан кыргызстандык аскер кызматкерлери менен да жолугушуу өттү. Анда алардын окуу шарттары жана даярдык процесси тууралуу маалымат берилди.
