Бишкек, 04.11.26. /Кабар/. Кыргызстан 2027-жылы КМШга мүчө мамлекеттердин жаштары катышкан "КМШ үчүн 100 идея" эл аралык конкурсун өткөрөт. Бул тууралуу Москва шаарында өткөн уюмга мүчө өлкөлөрдүн Жаштар иштери боюнча кеңешинин жыйынында маалымдалды.
Анда маданият, маалымат жана жаштар саясаты министринин биринчи орун басары Союзбек Надырбеков Кыргызстанда өтө турган сынакты уюштуруу жана өткөрүү боюнча даярдык иштери тууралуу маалымат берди.
Ведомствонун маалыматына караганда, жыйында КМШ өлкөлөрүнүн жаштар саясаты жаатындагы кызматташтыгын өнүктүрүү, жаштар менен иштөөдөгү актуалдуу маселелер жана келечектеги пландар талкууланды.
Иш-чара КМШнын Жаштар иштери боюнча кеңешинин түзүлгөндүгүнүн 20 жылдыгына жана шериктештиктин негизделгенинин 35 жылдыгына арналды.
Ага КМШга мүчө мамлекеттердин өкүлдөрү катышты.
