Ысык-Көл, 02.09.26 /Кабар/. VI Дүйнөлүк көчмөндөр оюндарынын алкагында Кырчын жайлоосундагы "Көчмөндөр ааламы" этно маданий шаарчасында бүгүн маданий жана спорттук масштабдуу иш-чаралар өтөт.
Программанын алкагында төмөнкү иш-чаралар белгиленген:
"Кут Ордо" негизги сахнасында:
- "Биримдик кербени" республикалык жана чет элдик меймандардын көч кербенинин келиши;
- "Дүйнө-өмүр" театралдык коюму жана "Көчмөндөр ааламы: жандуу мурас" маданий иш-чараларынын салтанаттуу ачылыш аземи;
- Чет элдик өнөрпоздордун концерттик программасы;
- Республикалык "Шамдагайлар" жигиттер арасында боз үйдү ылдамдыкта тигүү, ошондой эле кыз-келиндер арасында боз үйдү бат чечүү жана жыйноо сынактарынын тандоо этаптары;
- Облустар аралык "Жашоо жарыш" сынак-эстафетасы;
- "Башат" чыгармачыл программасынын алкагында байыркы кыргыз жоокеринин күжүрмөн зоот-кийимдеринин илимий-тарыхый реконструкциясынын бет ачары;
- Кыргыз-казак төкмө акындарынын эл аралык "Ырчылардын ыр эрөөлү" айтыш сынагынын жарым финалы.
"Көчмөндөр айылы" аймагында жана ордолордо:
- Бишкек шаарынын, Ош шаарынын жана Баткен облусунун ордолорунда "Көчмөндөр даамы" улуттук тамак-аш, "Мыкты кыргыз боз үйү" жана "Уз-уста" кол өнөрчүлүк сынактары;
- Элдик каада-салттар сынагынын алкагында "Үй көтөрүү", "Кыз узатуу" жана "Байбиче көтөрүү" театралдаштырылган оюн-зоок программалары;
- Ордолордо меймандар үчүн интерактивдүү оюн-зоок программалары.
"Ырыс Ордо" коомдук-маданий бирикмелеринин аянтында:
- "Кийиз Дүйнө" ордосунда түндүк көтөрүү, салттуу элечектин 20 түрү боюнча "110 Элечек ороо" салтын көрсөтүү, ала кийиз басуу, ак өргөө боз үйүнүн презентациясы жана чебер-класстар;
- "Мекендештер" ордосунда кийиз басуу, тумар жасоо, комуз чабуу, тогуз коргоол жана аркан тартыш боюнча чебер-класстар;
- "Достук" ордосунун ачылыш аземи, этно ашкана, "Сокур даам татуучу" сынагы жана "Достук чайы" чай аземи;
- "Жер Эне" ордосунда "Манас" айтуу, 40 уруунун санжыра баяны, улуттук тамак-аш фестивалы, тарыхый көргөзмө, акындар айтышы жана этно-концерт;
- "Ала-Тоо Айымдары" ордосунун ачылышы, кол өнөрчүлөрдүн көргөзмөсү, "Кыргыз айымы улуттун күзгүсү" форуму, "Эне мектеби" жана этномода көрсөтүүсү.
"Этно-Базар", Дүйнөлүк ашкана жана "Кичи көчмөн" аймактарында:
- Эл аралык "Этно-Базар" маданият жана туризм көргөзмө-жарманкесинин ачылыш аземи, кол өнөрчүлөрдүн чебер-класстары, облустук өнөрпоздордун концерттери жана "Шамал-фест";
- "Манас" эпосундагы жылдыздар дүйнөсү, "Кереметтүү космос" темасындагы лекциялар жана жылдыздуу асманды телескоп аркылуу байкоо;
- Дүйнөлүк көчмөндөр ашканасынын ачылышы урматына таттууларды кесүү, ашпозчулардын тандоо туру жана "Этно-бар" шоусу;
- Балдар жана өспүрүмдөр үчүн "Кичи көчмөн" аянтында "Баатырларды дайындоо" интерактивдүү оюну, чүкө ыргытуу, аркан тартыш жана башка сыноолор.
Спорттук программанын алкагында:
- Алыскы аралыкка ат марафону;
- Ордо, бүркүт салуу, жаа атуу, таяк тартыш (мас-рестлинг), аркан тартыш, сумо күрөшү, стронгмэн жана сөөктү сындыруу боюнча мелдештер;
- Улуттук классикалык күрөш жана кулатуу боюнча көрсөтмө мелдештер.
Эскерте кетсек, Кырчын жайлоосунда өтө турган бардык маданий жана спорттук иш-чараларга кирүү акысыз.
Белгилей кетсек, "Кабар" маалымат агенттиги VI Дүйнөлүк көчмөндөр оюндарынын Эл аралык маалыматтык өнөктөшү катары дүйнө көчмөн элдеринин мурасын сактоого жана даңазалоого багытталган ири этномаданий жана спорттук иш-чараны ыкчам жана көп тилдүү маалыматтык чагылдырууну камсыз кылат.
"Кабар" 1937-жылы негизделген Кыргызстандын алгачкы маалымат агенттиги. Агенттик кыргыз, орус, англис, араб, түрк жана кытай тилдеринде жаңылыктарды таратып, Кыргызстандагы жана Борбор Азиядагы маанилүү окуяларды чагылдырат.
