Бишкек, 21.04.26 /Кабар/. Ирландиянын Килдэр аймагында, Дублин шаарына жакын жерде жайгашкан Village at Lyons айылы сатыкка коюлуп, баасы 20 млн евро деп бааланды. Бул тууралуу BILD басылмасына таянып, Kazinform билдирди.
Маалыматка ылайык, айылды сатып алган жаңы ээси жөн гана кыймылсыз мүлк эмес, толук кандуу тарыхый комплекске ээ болот. Анын курамына таш үйлөр, чиркөө, паб, суу тегирмени жана канал жээгиндеги кооз аймактар кирет. Бул объектти мейманкана бизнеси катары же жеке резиденция катары пайдаланууга болот.
Бул айыл бир кезде кароосуз калып, 1990-жылдары Ryanair компаниясынын негиздөөчүсү Тони Райан тарабынан толук калыбына келтирилген. Калыбына келтирүүдө тарыхый көрүнүшүн сактоого өзгөчө көңүл бурулган.
Адистердин айтымында, мындай сунуш рынокто сейрек кездешет. Анткени сатып алуучу жөн гана имараттарды эмес, толук инфраструктурасы бар тарыхый жана туристтик комплексти алат.
Буга чейин Европада да мындай сатыкка байланыштуу кызыктуу учурлар катталган. Мисалы, Италиядагы Риччоне шаарында муниципалитет Бенито Муссолининин жайкы резиденциясын 1,2 млн еврого сатып алган.
Ал эми АКШда Meta компаниясынын негиздөөчүлөрүнүн бири Марк Цукерберг Флорида штатындагы Индиан-Крик аралынан 170 млн долларга өзгөчө кымбат сарай сатып алган.
