Бишкек, 07.04.26. /Кабар/. Ички иштер министрлиги жарандарды үй-бүлө ичиндеги зомбулукка кайдыгер карабоого чакырат.
Министрлик үй-бүлөлүк зомбулук – бул чыр-чатак же жеке маселе эмес, үй-бүлөнү бузган олуттуу көйгөй экенин эскертет. Мындай көрүнүштөр аялдардын, балдардын жана башка үй-бүлө мүчөлөрүнүн ден соолугуна жана өмүрүнө коркунуч жаратат.
Ведомстводон билдиришкендей, зомбулуктун алдын алуу максатында ички иштер органдары тарабынан профилактикалык иш-чаралар үзгүлтүксүз жүргүзүлүп келет. Анын алкагында жарандар менен түшүндүрүү иштери уюштурулуп, мыйзам талаптары жана жоопкерчилик тууралуу маалыматтар берилүүдө.
“Эгерде сиз же сиздин жакындарыңыз үй-бүлөлүк зомбулукка кабылып жатса, дароо жакынкы милиция бөлүмүнө же кыска 102 номерине кайрылууңуз зарыл. Ар бир кайрылуу сөзсүз түрдө каралып, мыйзам чегинде тиешелүү чаралар көрүлөт”, - деп белгилейт министрлик.
