Бишкек, 05.02.26. /Кабар/. Баткенде үй-бүлөлүк зордук-зомбулуктун алдын алууга багытталган көчмө жыйындар өтүүдө. Бул тууралуу президенттин аймактагы өкүлчүлүгүнөн билдиришти.
Президенттин өкүлүнүн орун басары Жаныбек Исаковдун жетекчилиги астында өтүп жаткан жыйында үй-бүлөлүк зордук-зомбулуктун келип чыгуу себептери кеңири талкууланды.
Адистердин маалыматына ылайык, акыркы жылдары зордук-зомбулук фактыларын жашырбай, ачыкка чыгаргандардын саны өсүүдө. Тактап айтканда, социалдык тармактар аркылуу же түздөн-түз укук коргоо органдарына кайрылып, фактылар расмий каттоого алынууда.
Ошол эле учурда үй-бүлөлүк зордук-зомбулуктун негизги себептери катары ичкилик, жумушсуздук, миграция жана коомдогу кайдыгерлик факторлору белгиленди.
Жаныбек Исаков зордук-зомбулуктун алдын алуу үчүн жергиликтүү бийлик, милиция жана коомдук уюмдар тыгыз кызматташуусу керектигин айтты.
Ошондой эле бул багытта жергиликтүү жетекчилерге бир катар конкреттүү тапшырмалар берилди.
