Бишкек, 06.07.26. /Кабар/. Европадагы катуу ысыктан улам Швейцариянын мөңгүлөрүн каптап турган кар адаттагыдан бир нече жума эрте эрип кетти. Окумуштуулардын айтымында, бул Альпы тоолорундагы мөңгүлөрдүн кезектеги ири көлөмдөгү муз жоготуусуна алып келет, деп билдирет АЗЕРТАЖ Reuters агенттигине шилтеме берүү менен.
Изилдөөчүлөр 29-июнда Швейцариянын түштүгүндөгү Рона мөңгүсүн каптап турган кышкы кар катмары толугу менен эрип бүткөнүн аныкташты. Эми мөңгүнү күн нурунан коргой турган эч нерсе калбагандыктан, ал кылымдар бою топтолгон өзүнүн негизги музун жогото баштады. Быйыл кышта кардын аз жаашы жана жайдын катуу ысышы мөңгүнүн мындай аялуу абалга келишин тарыхтагы эң эрте катталган экинчи көрсөткүчкө айлантты.
Швейцариянын мөңгүлөрүнө мониторинг жүргүзүү уюмунун директору Маттиас Хусстун айтымында, кылымдар бою чогулган муздардын эрүү мезгилинин бүтүшүнө дагы үч ай бар жана бул абдан кооптуу кырдаал. Маселен, июнь айындагы гана ысыкта Швейцария боюнча мөңгүлөрдөн аккан суунун көлөмү ушунчалык көп болгондуктан, эки жума бою ар бир алты секунд сайын олимпиадалык чоң бассейнди толтурууга жетмек.
