Бишкек, 09.09.26 /Кабар/. Эртең мененки тамак баланын өзүн кандай сезишине жана алгачкы сабактардагы көңүл топтоосуна таасир этиши мүмкүн. Бул тууралуу невролог Али Исмаилов айтып бергенин Lenta.ru басылмасы жазды.
Адистин айтымында, толук кандуу эртең мененки тамак катуу ачкачылыктан, алсыздыктан, баш оорудан жана уйкучулуктан сактанууга жардам берет.
Дарыгер күндү көп өлчөмдөгү таттуу азыктар - таттуу дан азыктары, токоч, шоколад пастасы жана таттуу суусундуктар менен баштоону сунуштабайт. Ошол эле учурда баланы таттуудан толугу менен чектөөнүн кажети жок. Анын айтымында, эң жакшы вариант - белоктун булагы, татаал углеводдор, бир аз май жана суюктук.
Адис мисал катары ботко менен жумуртканы, нан кошулган омлетти, мөмө-жемиш менен быштакты, табигый йогуртту, сырды жана жаңгактарды атады. Ал эртең мененки тамак сөзсүз түрдө татаал болушу шарт эмес экенин белгилеп, эң негизгиси ал балага көнүмүш, толук кандуу жана жаккан тамак болушу керектигин айтты.
Исмаилов сууга да өзгөчө көңүл бурду. Анын айтымында, бала мектепке дээрлик суюктук ичпей келсе, анда башы ооруп, алсырап же бат чарчап калышы мүмкүн.
Невролог ошондой эле толук кандуу эртең мененки тамакты туура уйку режими менен айкалыштыруу зарылдыгын белгиледи. Ошол эле учурда баланы күчкө салып тамактандырууга болбойт, анткени эртең менен анын табити төмөн болушу мүмкүн.
Дарыгердин айтымында, мээнин нормалдуу иштеши үчүн эс тутумду жана интеллектти жакшыртат деп саналган бир гана азык-түлүктү издегенге караганда, үзгүлтүксүз уйку, туура тамактануу, жетиштүү көлөмдө суу ичүү жана күн тартибин сактоо алда канча маанилүү.
