Ысык-Көл, 01.09.26 /Кабар/. Чолпон-Атада “Көчмөндөр жаңырыгы” эл аралык этно-ыр фестивалы ачылды.
Иш-чарага миңдеген шаар тургундары, Көчмөндөр оюндарынын коноктору жана чет элдик туристтер катышууда.
Фестиваль бир катар телеканалдар аркылуу түз эфирде көрсөтүлүп жатат.
Учурда иш-чара театралдаштырылган программа менен коштолууда.
Иш-чара 4-сентябрга чейин уланат. Анда дүйнөнүн төрт континентинен — Европа, Азия, Америка жана Африкадан келген өнөрпоздор катышат. Жалпысынан 20 өлкөдөн 21 конкурсант 42 чыгармачылык номер тартуулайт.
Анын алкагында дүйнөнүн ар кайсы аймактарынан көчмөндөрдүн маданиятын жана рухун алып келген “Биримдик кербени” уюштурулат.
* 2-сентябрь — “Этно-хит” күнү. Анда катышуучулар улуттук музыкалык мурастарын тартуулашат.
* 3-сентябрь — “Дүйнөлүк хит” күнү. Бул күнү дүйнөгө белгилүү чыгармалар улуттук музыкалык өзгөчөлүктөр менен аткарылат.
* 4-сентябрда фестивалдын чоң финалы өтөт.
