Бишкек, 28.05.26. /Кабар/. Жакынкы беш жылда Жер шаарындагы глобалдык температура рекорддук жогорку деңгээлде же ага жакын көрсөткүчтө сакталышы ыктымал. Бул тууралуу БУУнун бейшемби күнү жарыяланган климаттык жаңы божомолунда айтылат, деп жазды АЗЕРТАЖ.
Маалыматка ылайык, мында орточо жылдык температура өнөр жай өнүккөнгө чейинки мезгилге салыштырмалуу 1,9 градуска чейин көтөрүлүшү мүмкүн.
"2026–2030-жылдар аралыгында Жерге жакын абанын орточо жылдык температурасы 1850–1900-жылдардагы орточо көрсөткүчтөн 1,3төн 1,9 градуска чейин жогору болот. БУУнун Бүткүл дүйнөлүк метеорологиялык уюму менен Улуу Британиянын Метеорологиялык кызматынын талдоосу көрсөткөндөй, алдыдагы беш жылдын ичинде тарыхтагы эң ысык жылдын рекорду жаңыланышынын ыктымалдуулугу 86 пайызды түзөт", — деп айтылат БУУнун божомолунда.
2024-жылдагы рекорддук ысык температура дүйнө өлкөлөрү глобалдык жылуулукту чектөө үчүн белгилеген 1,5 градустук чектен ашып кеткен. Окумуштуулар жакынкы беш жылдын ичинде эң аз дегенде бир жыл ушул деңгээлге жетеринин ыктымалдуулугу 91 пайыз экенин аныкташты. Ошондой эле 2026–2030-жылдардагы беш жылдыктын орточо көрсөткүчү 1950–1990-жылдардагы орточо көрсөткүчтөн 1,5 градустан ашып кетишинин ыктымалдыгы 75 пайызга барабар.
Изилдөөлөр көрсөткөндөй, алдыдагы беш кышта Арктикадагы температура 1991–2020-жылдардагы орточо көрсөткүчтөн 2,8 градуска жогору болот деп болжолдонууда. Бул көрсөткүч ошол эле мезгилдеги дүйнөлүк орточо температуранын четтөөсүнөн 3,5 эсеге көп.
Ошондой эле адистер жакынкы беш жылда Түндүк Европада кыш мезгили өтө жаанчыл жана нымдуу болушу мүмкүн экенин эскертишет. Бул аймак үчүн башкы климаттык коркунуч болуп саналат жана суу ташкындарынын келип чыгуу коркунучун жаратат.
