Бишкек, 21.01.26. /Кабар/. Бишкекте "Киберкоопсуздук: уюштуруучулук-укуктук маселелер, эл аралык жана улуттук стандарттар, көйгөйлөр, коркунучтар, чакырыктар жана алардын Борбор Азия өлкөлөрүнүн улуттук коопсуздугуна тийгизген таасири" аталган эл аралык илимий-практикалык конференция өтүүдө.
Иш-чаранын максаты Борбор Азия аймагында киберкоопсуздукту камсыздоо, жаңы технологиялардын өнүккөн шартында жаңы чакырыктарга, коркунучтарга биргелешип каршы туруу жана тажрыйба алмашуу.
Белгилей кетсек, конференцияда Казакстан, Өзбекстан, Тажикстан, Россия жана Кыргызстандын окумуштуулары, мамлекеттик жана укук коргоо органдарынын өкүлдөрү аталган теманын алкагында изилдөөлөрүн сунуштап, өз өлкөсүндө бул багытта аткарылып жаткан иштер тууралуу маалымат беришүүдө.
Илимий иш-чарага президенттин аппаратынын, министрликтердин, ведомстволордун, укук коргоо жана фискалдык органдардын, коомдук жана эл аралык уюмдардын, эксперттик-аналитикалык түзүмдөрдүн, изилдөө борборлорунун өкүлдөрү, чет өлкөлүк эксперттер катышууда.
