Бишкек, 11.04.25. /Кабар/. Бишкекте өспүрүмдөр арасындагы кылмыштуулуктун алдын алуу боюнча рейд уланууда.
Муниципалитеттин маалыматына ылайык, иринчи Май райондук администрациясы РИИБнин жашы жете элек өспүрүмдөр менен иштөө инспекциясы, Социалдык өнүктүрүү башкармалыгы жана райондук муниципалдык аймактык башкармалыгы менен биргеликте аткарылган рейддин жүрүшүндө «Азиз», «Кудайберген» жана «Сары-Өзөн» базарлары текшерилип, жыйынтыгында 5 өспүрүм эмгекке тартылгандыгы аныкталды. Аларга мындай мыйзам бузууларга жол бербөө боюнча түшүндүрүү иштери жүргүзүлүп, андан соң жашы жете элек балдар мыйзамдуу өкүлдөрүнө өткөрүлүп берилди.
Бардык аныкталган жашы жете электерге протоколдор түзүлүп, андан ары профилактикалык иштерди жүргүзүү жана социалдык жактан колдоо көрсөтүү үчүн тиешелүү каттар жашаган жери боюнча райондордун Социалдык өнүктүрүү бөлүмдөрүнө жиберилет.
Белгилей кетсек, рейддик иш-чаралар системалуу түрдө жүргүзүлүүдө. Балдар эмгегин эксплуатациялоонун алдын алуу боюнча иш берүүчүлөр жана чарбалык субъекттер менен түшүндүрүү иштери өткөрүлүүдө.
"Жашы жете электердин өмүрүнө жана ден соолугуна коркунуч туудурган фактыларды билдирүү үчүн күнү-түнү иштеген “111 ишеним телефону”, ошондой эле Биринчи Май райондук социалдык өнүктүрүү башкармалыгынын үй-бүлөнү жана балдарды колдоо бөлүмүнүн ишеним телефону иштейт: 67-03-86",-деп айтылат маалыматта.
Эске салсак, Кыргыз Республикасынын мыйзамдарына ылайык, ата-энелер балдарын тарбиялоо, багуу жана коопсуздугу үчүн жооптуу.
