Бишкек, 15.02.25. /Кабар/. Бүгүн Бишкек – Нарын – Торугарт унаа жолунун боюнда айлана-чөйрөнү жашылдандыруу, көрктөндүрүү ишембилиги өттү.
Өзгөчө кырдаалдар министри Бообек Ажикеевдин жетекчилигинде куткаруучулар, токойчулар жана жергиликтүү бийлик өкүлдөрү "Жашыл мурас" улуттук өнөктөштүгүнүн алкагында ийне жалбырактуу дарактары отургузушту. Ишембиликте 2 миң түп тянь-шань карагайын отургузуу пландалган.
Ишембилик Өзгөчө кырдаалдар министрлигинин Токой кызматы, президенттин Чүй облусундагы өкүлчүлүгү, Кемин райондук мамлекеттик администрациясы жана жергиликтүү бийлик органдары тарабынан уюштурулууда.
Эске салсак, үстүбүздөгү жылдын 29-январында аталган иш-чаранын алкагында 500 түп ийне жалбырактуу тянь-шань карагайы отургузулуп, экологиялык абалды жакшыртууга багытталган.
Өнөктөштүктүн негизги максаты — аймактагы экологиялык абалды жакшыртуу, ошондой эле жол аймактарындагы жашылдандыруу иштерин күчөтүү.
Бул жылы Кемин районунан Балыкчы шаарына чейинки унаа жолунун 50 чакырымдык бөлүгүндө бак отургузуу каралган.
