Бишкек, 29.04.26. /Кабар/. "Бишкек электр тармактар" ишканасында мамлекеттик каражаттарды мыйзамсыз чыгарып кетүү боюнча туруктуу кылмыштуу схема аныкталды. Бул тууралуу ИИМден билдирди.
Тергөөнүн маалыматы боюнча, ишкананын директору А.М., башкы бухгалтер Ч.И. жана анын орун басары Д.Ш. 2023-жылдан 2026-жылдын мартына чейин өз ара сүйлөшүп алып, коррупциялык схеманы уюштурушкан.
Шектүүлөр жасалма ведомостторду түзүп, ишкананын акчасын "айлык акы" катары бухгалтердин орун басары Д.Ш.нын банктык эсебине которуп турушкан. Кийин ал каражаттар накталай чыгарылып, катышуучулар ортосунда бөлүштүрүлүп келген. Жыйынтыгында мамлекетке өзгөчө ири өлчөмдө зыян келтирилген.
Бул факты боюнча "Кызмат абалын кыянаттык менен пайдалануу" беренеси менен кылмыш иши козголду.
Ыкчам иш-чаралардын алкагында жогоруда аты аталган кызматкерлер кармалып, соттун чечими менен 2 айга камакка алынды.
Учурда келтирилген зыяндын так көлөмүн аныктоо боюнча тергөө иштери улантылууда.
