Бишкек, 05.06.26 /Кабар/. Беларусь премьер-министри Александр Турчин расмий сапарынын алкагында Бишкек санитардык полигонуна жана жаңы курулуп жаткан эко-технологиялык заводго барды. Бул тууралуу мэриядан билдиришти.
Шаар мэри Айбек Жунушалиев конокко 2025-жылдын декабрында ачылган таштанды сорттоочу линияны жана Фере көчөсүндөгү кайра иштетүүчү ишкананы тааныштырды. Бул объекттердин технологиялык жабдууларын Беларустун "Сифания - Экотехника" компаниясы жеткирген.
Александр Турчин Бишкекте калдыктарды кайра иштетүү боюнча натыйжалуу туюк цикл түзүлгөнүн жогору баалады.
Ошондой эле делегация таштандыдан электр энергиясын өндүрүүчү эко-технологиялык заводдун курулушу менен таанышты.
Белгиленгендей, долбоор толук ишке киргенде күнүнө 3 миң тоннага чейин катуу калдыктарды кайра иштетип, саатына 90 МВтга чейин электр энергиясын өндүрөт. Ошондой эле Борбор Азиядагы эң ири ушундай типтеги экологиялык долбоор болуп калат.
Иш сапардын жыйынтыгында мэр Айбек Жунушалиев бул жолугушуу эки тараптуу кызматташтыкты мындан ары өнүктүрүүгө чоң салым кошоорун белгиледи.
