Бишкек, 22.01.26. /Кабар/. Базар-Коргондо милиция кзматкерине 100 миң сом пара берүүгө аракет кылган жаран кармалды. Бул тууралуу ИИМден билдиришти.
Маалыматка ылайык, текшерүүдө турган материал боюнча кылмыш жоопкерчилигинен кутулууну көздөгөн С.И. аттуу жаран кылмыш ишин козгобоо үчүн тергөөчүгө пара сунуштап, мыйзамсыз таасир этүүгө аракет кылган.
Аталган факты боюнча "Пара берүү" беренеси менен кылмыш иши козголгон.
Жүргүзүлгөн ыкчам иш-чаралардын жыйынтыгында Базар-Коргон РИИБинин Тергөө кызматынын кызматтык бөлмөсүндө 1973-жылы туулган С.И. пара катары 100 миң сом берип жаткан жеринен кармалган.
Кармалган жаран шектүү катары суракка алынып, мыйзамда белгиленген тартипте убактылуу кармоочу жайына киргизилди.
Учурда бул факты боюнча зарыл болгон тергөө аракеттери жүргүзүлүүдө.
