Бишкек, 06.08.25. /Кабар/. Базар-Коргондо "Хизб ут-Тахрир аль-Ислами" диний-экстремисттик уюмунун буга чейин соттолгон мүчөлөрү жума намаз учурунда экстремисттик идеологиядан эл алдында баш тартышты. Бул тууралуу УКМКдан билдиришти.
Тактап айтканда, 1-августта Арстанбап айылынын борбордук мечитинде жума намаздан кийин мурда соттолгон аталган ДЭУнун 12 жактоочусу өздөрү тандап алган диний агымдардын туура эместигин моюндап, деструктивдүү идеяларынан баш тартышты. Ошондой эле алар жарандарды "Хизб ут-Тахрир аль-Ислами" жана башка диний-экстремисттик уюмдардын мүчөлөрүнүн мыйзамсыз чакырыктарына алданбоого чакырышты.
Белгилей кетсек, жогоруда аталган адамдар мурда өздөрүн "Хизб-ут-Тахрир аль-Ислами" ДЭУнун мүчөлөрү катары тааныштырып, жергиликтүү тургундардын арасынан жаңы тарапташтарды тартууну көздөп, экстремисттик идеологияны жайылтуу максатында Арстанбап айылында жума сайын жашыруун түрдө диний сабактарды (дарстарды) өткөрүп келишкен.
Алар ушул жылдын январь айында жүргүзүлгөн атайын иш-чаранын натыйжасында кармалып, 2025-жылдын апрель айында аларга карата соттук айыптоо өкүмү менен айып пул салынган.
УКМК тарабынан Кыргызстандын аймагында тыюу салынган диний уюмдардын жана алардын тарапташтарынын ишмердүүлүгүн аныктоо жана бөгөт коюу боюнча иштер уланууда.
