Бишкек, 24.01.25. /Кабар/. Баткен облусунун Кадамжай районундагы Үч-Коргон жалпы дарыгерлик практика борборунда лапароскопиялык аппараттын жардамы менен бейтаптарга операция жасалууда.
Президенттин облустагы өкүлчүлүгүнөн маалымдашкандай, заманбап медициналык жабдуу Япония элчилиги тарабынан 89 667 АКШ долларына сатылып алынган.
Жаш дарыгер Абдыкалык Маматовдун айтымында, лапароскопиялык аппарат менен акыркы алты айда 60дан ашуун операция ийгиликтүү жасалды.
Медицина кызматкерлери белгилешкендей, аталган жабдуу бейтаптын денесин кеспей туруп, ички органдарына кичинекей тешик аркылуу оптикалык аспаптын жардамы менен операция жасоого мүмкүндүк берет. Бул өз кезегинде бейтаптын тез калыбына келишине өбөлгө түзөт.
