Бишкек, 24.01.25. /Кабар/. Баткен облусунун Кадамжай районундагы Үч-Коргон жалпы дарыгерлик практика борборунун техникалык базасы жакшыртылды. Бул тууралуу президенттин облустагы өкүлчүлүгүнөн билдиришти.
Маалыматта белгиленгендей, оорукананын материалдык-техникалык базасын чыңдоо иштери республикалык бюджеттин эсебинен каржыланып, ошондой эле бейөкмөт уюмдар менен демөөрчүлөр да колдоо көрсөтүштү.
Жарандарга медициналык кызмат көрсөтүү шарттарын түзүү үчүн Бириккен Улуттар Уюмунун өнүгүү программасы (ПРООН) тарабынан 6 млн сомго көчмө жана стационардык санарип рентген аппараты алынды. Баткен Милдеттүү медициналык камсыздандыруу фонду тарабынан жандандыруу бөлүмү 4 млн сомдук медициналык жабдуулар, операциялык блок керектүү шаймандар менен камсыздалды. Ошондой эле жылытуу системасы борборлоштурулуп, имараттын чатыры алмаштырылды.
Ал эми Япония элчилиги тарабынан 89 667 долларга лапороскопия аппараты алынды. Ымыркайлар үчүн 590 миң сомдук инкубатор, демөөрчүлөрдүн колдоосу менен 2 даана жасалма дем алдыруучу аппарат 1,5 млн сомго сатып берилди.
Мындан тышкары, Хасанабад жана Тегирмеч айылына инвесторлордун көмөгү аркылуу 5,5 млн сомго ФАП курулду. Демөөрчүлөрдүн колдоосу менен оорукананын бөлүмдөрү оңдоп-түзөөдөн өттү.
Ошол эле маалда оорукананын аймагы асфальтталып, унаа токтоочу жай курулду. Учурда өлүккана менен аллеянын курулушу жүрүүдө.
Эске салсак, өткөн жылы оорукананын балдар бөлүмү жана балдар реанимациясы жайгашкан типтүү имарат республикалык бюджеттин эсебинен 58 млн сомго курулган.
Үч-Коргон жалпы дарыгерлик практика борбору аймактагы 80 миңге жакын тургунду тейлейт.
