Бишкек, 14.09.26. /Кабар/. Чек ара окуяларында курман болгон мекен коргоочулардын жаркын элесине арналып Кадамжай районунун А.Масалиев айыл өкмөтүнүн алдында БТР-70 аскердик техникасы орнотулган постаменттин ачылыш аземи өттү. Бул тууралуу өкүлчүлүктөн билдиришти.
Маалыматка ылайык, иш-чарага облус жетекчиси Мамыржан Рахимов, жергиликтүү бийлик өкүлдөрү, мекен коргоочулардын жакындары, ардагерлер, коомдук уюмдардын өкүлдөрү жана айыл тургундары катышты.
Мамыржан Рахимов бул эстеликтин мааниси терең экенин белгиледи.
“Бул эстелик — жөн гана аскердик техниканын үлгүсү эмес. Бул — чек араны кайтарган жоокерлердин эрдигинин, кайратынын жана Мекенге болгон берилгендигинин символу. Мекен үчүн кызмат кылуу — чоң сыймык. Ал эми зарыл учурда Мекендин бүтүндүгү үчүн өз өмүрүн курман кылуу — адамдын эң бийик эрдиги”,** — деди Мамыржан Рахимов.
Жаңы эстелик өлкөнүн аймактык бүтүндүгүн жана эгемендүүлүгүн коргоодо курман болгон мекенчил уулдардын эрдигин түбөлүккө даңазалап турат.
Аземдин катышуучулары курман болгон жоокерлердин жаркын элесине таазим кылып, эстеликке гүлчамбарларды коюшту.
Ошондой эле каза болгондорго багышталып куран окулду.
Ал эми мекен сакчыларынын эрдигин даңазалоо менен келечек муунга татыктуу жеткирүү боюнча салым кошкон инсандарга сыйлыктар тапшырылды.
Иш-чара маданий программа менен улантылды.
