Бишкек, 27.01.25. /Кабар/. Баткен облусунун Кызыл-Кыя шаардык ооруканасында фиброскан аппараты иштеп баштады.
Президенттин Баткен облусундагы өкүлчүлүгүнүн басма сөз кызматынан билдиришкендей, аталган жабдык республикалык бюджеттин эсебинен сатып алынган.
Фибраскон - боордун абалын баалоо үчүн колдонулган медициналык аппарат. Бул аппарат боордун жумшактыгын же катуулугун өлчөө аркылуу боордун абалы жөнүндө маалымат берет. Ал боор фиброзу, майлуу боор оорулары жана башка боор ооруларын аныктоо жана мониторинг жүргүзүү үчүн колдонулат.
Буга чейин Баткен облусунун жарандары аталган аппараттын жоктугунан Ош шаарына барып кароодон өтүп турган.
Белгилей кетсек, Баткен облусу боюнча 2500дөн ашуун адам кан аркылуу жугуучу гепатиттин B,C,D түрү менен жабыркап, каттоодо турат.
