Бишкек, 05.10.26. /Кабар/. Суу ресурстары, айыл чарба жана кайра иштетүү өнөр жайы министринин орун басары Рысгүл Акимжанова Баткен облусуна болгон иш сапарынын алкагында Баткен районунда болду.
Ведомстводон билдиришкендей, иш-сапардын жүрүшүндө президенттин Баткен облусундагы ыйгарым укуктуу өкүлү Мамыржан Рахимов менен жолугушуп, аймакты органикалык айыл чарба өндүрүшүнө өткөрүү, органикалык продукцияны өндүрүү жана кайра иштетүү, ошондой эле өнөр жай ишканаларын куруу маселелерин талкуулады.
Андан соң Баткен ветеринардык лабораториясынын, Кайра иштетүү өнөр жайы жана органикалык айыл чарба департаментинин Баткен башкармалыгынын жана өсүмдүктөрдү карантин лабораториясынын ишмердүүлүгү менен таанышты. Мекеме жетекчилери аткарылып жаткан иштер жана көйгөйлүү маселелер тууралуу маалымат берип, анын ичинде квалификациялуу кадрлардын жетишсиздигин белгилешти.
Көтөрүлгөн маселелер боюнча министрдин орун басары Баткен райондук агрардык өнүктүрүү башкармалыгынын башчысы Илияс Сайфидиновго тиешелүү тапшырмаларды берип, айыл чарба, органикалык өндүрүш жана кайра иштетүү багытындагы иштерди күчөтүүнү тапшырды.
