Бишкек, 14.02.25. /Кабар/. Баткен облусунун район-шаарларында жана айыл аймактарында айыл чарба жарманкелери өтүп жатат. Бул тууралуу президенттин аймактагы өкүлчүлүгүнөн билдиришти.
Маалыматка ылайык, жарманкенин максаты азык-түлүк коопсуздугун камсыздоо, баалардын негизсиз жогорулашын алдын алуу, жергиликтүү өндүрүүчүлөрдү колдоо болуп саналат.
"Бул өнөктүк аймактарда азык-түлүк бааларын турукташтыруу жана калкты жеткиликтүү баадагы айыл чарба продукциялары менен камсыздоо боюнча министрлер кабинетинин тапшырмасына ылайык уюштурулууда", - деп айтылат маалыматта.
Жарманкеде жергиликтүү дыйкан фермерлер, багбандар жана ишкерлер өндүргөн продукциясын ортомчусуз түз сатуу мүмкүнчүлүгүнө ээ болууда. Ал эми тургундар, базар баасынан арзан, экологиялык жактан таза, сапаттуу азык түлүктөрдү сатып алуусуна шарт түзүлүүдө.
