Бишкек, 15.02.25. /Кабар/. Ат-Башыда биринчи жолу Германиядан чыгарылган Лапароскоп аппаратынын жардамы менен өткө операция жасалды.
Райондук администрациядан билдиришкендей, операция борбор калаадагы клиникалардын мыкты профессор дарыгерлери тарабынан жасалып, Ат-Башы райондук бириктирилген ооруканасынын хирургия бөлүмүнүн хирург-дарыгерлеринин жамааты да катышып тажрыйба алышты.
Лапароскоп хирургиялык аппарат, калкка сапаттуу медициналык жардам көрсөтүү, операцияга болгон муктаждыктарды жеңил чечүү максатында Япон эллчилиги аркылуу 7,6 млн сомго алынып берилген.
Бул жабдыктын камерасы так, даана көрсөтөт.
Анын жардамында абдоминалдык хирургия, гинекология, лор, боор жана урология багыттарында да операция жасоого мүмкүнчүлүк бар.
Лапароскоп аппараты менен гинекологиялык операцияларды да, өт алдыруу, аппендицитти жасоого болот жана ички органдарга диагностика да жүргүзөт. Буга чейин операцияга муктаж болгон бейтаптар Бишкек шаарына барып, диагностика өтүп, андан кийин операция жасатууга бир топ убакыт кетип, жарандарга ыңгайсыздыктар жаралып келген.
Мындан ары райондук оорукананын хирург-дарыгерлери Лапароскоп аппараты менен жогорудагыдай операцияларды жеринде жасап, калкка медициналык жактан сапаттуу кызмат көрсөтүп, калктын саламаттыгын чыңдоого зор салымын кошот.
