Бишкек, 07.10.26 /Кабар/. 30 жашка чейинки жаш манасчылардын арасында республикалык кароо-сынагы өтөт. Бул тууралуу Маданият, маалымат жана жаштар саясаты министрлиги билдирет.
Маалыматка ылайык, кароо-сынак эки айлампа менен өтөт. Биринчи айлампа 12-октябрда саат 09:00дө Кыргыз улуттук “Манас” театрында өтүп, катышуучулар эркин темада 3-5 мүнөт “Манас” айтышат.
Экинчи айлампа 22-октябрда саат 09:00дө Ысык-Көл облусунун Тоң районундагы Бөкөнбаев айылында өтүп, катышуучулар билет аркылуу туш келген темада 3-5 мүнөт “Манас” айтышат.
Жеңүүчүлөрдү 3-5 адистен турган калыстар тобу аныктайт. Упайлар тең болуп калган учурда катышуучуларга кошумча суроолор берилет.
Сынактын жеңүүчүлөрүнө байгелүү орундар жана белектер тапшырылып, сыйлоо аземи кароо-сынактын жыйынтыгында өткөрүлөт.
Иш-чара “Манас” театры тарабынан залкар манасчы Мамбет Чокмор уулунун 130 жылдык мааракесине карата уюштурулууда.
