Бишкек, 23.02.26. /Кабар/. №27 түзөтүү мекемесинин мурдагы жетекчиси кармалды. Бул тууралуу Ички иштер министрлигинен билдиришти.
Маалыматка ылайык, 1969-жылы туулган К.Ш. аттуу жаран арыз менен кайрылып, Жаза аткаруу кызматынын түзөтүү мекемелеринин биринин башчысына карата чара көрүүнү өтүнгөн. Жабырлануучунун билдирүүсү боюнча, 2025-жылдын декабрь айында «Алдамчылык» беренеси менен соттолгон адамды шарттуу түрдө мөөнөтүнөн мурда бошотуу маселесин чечүү үчүн кызматкер андан 30 миң доллар акча алган.
Бул факты боюнча ИИМдин Тергөө кызматы тарабынан Кылмыш-жаза кодексинин «Пара алуу» беренеси менен кылмыш иши козголду.
Ыкчам-издөө иш-чараларынын жүрүшүндө №27 түзөтүү мекемесинин мурдагы башчысы, 1984-жылы туулган Т.М. кармалып, убактылуу кармоочу жайга киргизилди. Учурда зарыл болгон тергөө амалдары жүргүзүлүүдө.
ИИМ аталган адамдын мыйзамсыз аракеттеринен жабыр тарткан жарандарды 0709 843 307 же 102 номуруна чалып, маалымдоого чакырат.
