Бишкек, 25.12.25. /Кабар/. Президент Садыр Жапаров IV Элдик курултайдын жыйынында Ысык-Көлдүн абалына көңүл буруп, анын уникалдуу жаратылыш объектиси жана аймактын маанилүү экосистемасы катары баалуулугун баса белгиледи.
Анын айтымында, 1854-жылдан бери көлдүн суусунун деңгээли дээрлик 14 метрге төмөндөп, суунун жалпы көлөмү болжол менен 85 млрд куб метрди түзөт. Бул убакыттын ичинде көлгө куйган дарыялардын саны үч эседен ашык кыскарган: эгерде 1950-1960-жылдары Ысык-Көлгө 100-110дой дарыя куйса, учурда алардын 30-35и гана калган.
Президент мындай тенденциянын сакталып калышы аймак үчүн олуттуу экологиялык жана социалдык-экономикалык кесепеттерге алып келиши мүмкүн экенин белгиледи.
"Өкмөт кырдаалды турукташтыруу үчүн зарыл чараларды көрүүдө: көлгө куйган суулардын көлөмү көбөйтүлүп, жаңы каналдарды жана гидротехникалык курулмаларды куруу боюнча долбоорлор ишке ашырылып жатат", — деп билдирди Садыр Жапаров.
Ал бул чаралар Ысык-Көлдүн уникалдуу экосистемасын сактоого, калктын жашоо-турмушун жана аймактын туризм тармагын коргоого багытталганын баса белгиледи.
