Бишкек, 19.10.26 /Кабар/. 8-октябрдан 15-октябрга чейин борбор калаанын төрт районунда Бишкек шаарынын жергиликтүү жамаатынын жыйынына өкүлдөрдү шайлоо боюнча тургундардын жыйындары өткөрүлдү.
Бишкек мэриядан билдиришкендей, шаардык жыйын 24-октябрда өтөт. Анын жүрүшүндө 18-декабрда өтө турган V Элдик курултайга катышуу үчүн Бишкек шаарынан 72 делегат шайланат.
Иш-чаралар президенттин "Кезектеги V Элдик курултайды өткөрүү жөнүндө" жарлыгына ылайык уюштурулду.
Борбор калаанын райондорунда өткөн жыйындардын жыйынтыгында жергиликтүү жамааттын 469 өкүлү шайланды.
Биринчи май районунда 8 жыйын өткөрүлүп, анын жыйынтыгында 75 өкүл шайланды. Ленин районунда 9 жыйын өтүп, 129 өкүл тандалды. Свердлов районунда 10 жыйын өткөрүлүп, 134 өкүл шайланды. Октябрь районунда 7 жыйын өтүп, анын жыйынтыгында 131 өкүл шайланды.
Жыйындарга борбор калаанын райондорунун тургундары жана Бишкек шаардык кеңешинин депутаттары катышты.
