Бишкек, 30.01.26. Кабар/. Соода-өнөр жай палатасынын президенти Темир Сариев тигүү тармагынын өкүлдөрү менен негизги өнүгүү маселелерин талкуулоо үчүн жолукту. Бул тууралуу аталган мекемеден билдиришти.
Маалыматка ылайык, талкууда Соода-өнөр жай палатасында бизнес өкүлдөрүнүн, тармактык ассоциациялардын жана тармактык адистердин катышуусунда эксперттик жумушчу топ түзүү чечими кабыл алынды.
Жумушчу топтун артыкчылыктуу милдеттери:
- тигүү тармагындагы ак ниет ишкерлер реестрин түзүү;
- чакан тигүү цехтерин бейформал сектордон акырындык менен алып салуу механизмдерин иштеп чыгуу;
- тармактагы ишканаларга кредиттик каражаттарды бөлүштүрүүнүн ачык-айкын жана адилеттүү схемасын иштеп чыгуу;
- тигүү жумушчулары жана башкаруучу персонал үчүн окутуу программаларын жана кесиптик өнүгүүнү уюштуруу; тармактын өсүшү жана модернизацияланышы үчүн туруктуу шарттарды түзүү боюнча сунуштарды даярдоо.
Темир Сариев палата бизнес менен мамлекеттик органдардын ортосундагы диалог үчүн кызмат кылууга, ошондой эле ачык-айкын, атаандаштыкка жөндөмдүү жана экспортко багытталган кийим тигүү өнөр жайын өнүктүрүүгө көмөктөшүүгө даяр экенин белгиледи.
